Ang Linggwistikang Pilipino: Kasaysayan, Kalagayan at Patutunguhan

Abstract

Malawak ang saklaw ng linggwistikang Pilipino sa kasalukuyan. Kung tutuusin, hindi lamang ito mga gawaing linggwistika na naganap o nagaganap sa Pilipinas kung hindi pati na ang mga ginawa o ginagawa sa University of Hawaii o sa University of Michigan o sa Yale University. Sa ganoon, ipinalalagay na ang mga nahuhuling pag-aaral ay tinawag na linggwistikang Pilipino dahil mga wika sa Pilipinas ang mga sinusuri. Kung baga sa linggwistikang Tsino, mga wikang Intsik naman ang pinag-aaralan. Sa papel na ito mas bibigyang-pansin ang mga gawaing linggwistika na nagaganap o nagaganap sa Pilipinas.